Նոյեմբեր ամիսը մեր կրթահամալիրում միշտ տոնական է․ պատրաստվում ենք մեր տոնին, ներկայացնում սեբաստացի սովորողներին, ընտանիքներին, ուսուցիչներին, թթու ենք դնում, հաց թխում և այս ամենը եզրափակում ենք հարիսայի ծեսով։ Այս տարի հարիսայի ծեսին միացրել էինք նաև ցուցադրություն-վաճառք-հանգանակություն։ Ցուցադրությանը ներկայացված էին սովորողների արված աշխատանքները՝ թթու, դիմանկարներ՝ գուաշով և աշնանային տերևներով, ընտանեկան թխիկներ, մեր բակի փշատը, որը սովորողներն էին հավաքել և ադի բուդի։ Հանգանակության արդյունքում առաջին դասարան սովորողները սեբաստացի հիմնադրամի հաշվեհամարին փոխանցեցին տասնյոթ հազար դրամ։
Արաքս Հովհաննսիայանի հետ ունեցել ենք ամենօրյա քննարկումներ՝ նախօրոք կազմած նախագծերի ընթացքի, արդյունքների վերաբերյալ, միասին ընտրել ենք ճամփորդության վայրը, կազմել նախագիծը: Քննարկել ենք նաև ամենօրյա ուսումնական գործունեության ընթացքում առաջացող խնդիրները, միասին գտել ենք լուծումներ․ օրինակ՝ ինչպես ներկայացնել այս կամ այն նյութը, որ սովորողներն ավելի հեշտ ընկալեն, յուրացնեն և այլն։
Արաքսը դեկտեմբեր ամսվա մաթեմատիկայի առաջին մակարդակի ֆլեշմոբի պատասխանատուներից մեկն է։ Քանի որ առաջին անգամ է կազմում ֆլեշմոբային խնդիրներ, միասին ենք անում աշխատանքը։ Աշխատանքը ընթացի մեջ է, կներկայացնենք։
Այսօր շատ հետաքրքիր, հագեցած օր անցկացրինք «Կէան» կրթամշակութային կենտրոնում։ Ամեն ինչ կազմակերպված էր ամենայն մանրամասնությամբ։ Հենց դռնից մեզ սպասվում էր անակնկալ․ դռան վրա կապված էր հանելուկ, որի լուծումը գուշակելուց հետո՝ մեր առաջ բացվեցին կենտրոնի դռները։ Բակում՝ խաղ- ծանոթությունից հետո, մեզ նոր հանելուկ էր սպասվում։ Հանելուկը գուշակեցինք, և մեզ հյուր եկավ ամենահետաքրքիր մամիկը։ Մամիկը՝ ձեռքին ցորենով լի թաս, բարևի երգով իջավ բակ՝ գերելով սովորողների սրտերը։ Ցույց տվեց, թե ինչպես են ցորեն ցանում, պատմեց ցորենի արտի, հասնելու, հնձվորի մասին, այնուհետև ցորենը լցրեց սանդի մեջ և սովորողներին սովորեցրեց ցորեն ծեծել, թեփն առանձնացնել։ Ամբողջ ընթացքում սովորողները մամիկի հետ երգում էին աշխատանքային երգեր։ Այնուհետև բարձրացանք հեքիաթի սենյակ, սովորողները նստեցին բարձերի վրա, և մամիկը պատմեց շատ հետաքրքիր հեքիաթ՝ հաց ստեղծելու մասին։ Հեքիաթը ևս շատ հետաքրքիր ներկայացվեց՝ ընթացքում զրույց-քննարկումներով, երգով։ Հեքիաթի ավարտից հետո զրուցեցին հացի նշանակության, աշխատանքի, միասնականության մասին, նշեցին հացի ստեղծման բոլոր փուլերը։ Եվ, ինչպես բոլոր հեքիաթների վերջում, սնդուկում երկնքից խնձորներ հայտնվեցին՝ հեքիաթը լսողների, պատմողի և ստեղծողի համար։ Խնձորները վայելելուց հետո՝ սովորողներն իրենց տպավորությունները նկարեցին՝ հիշատակ թողնելով կենտրոնին։
Թոնիրն արդեն վառված էր, մեզ կանչում էր առաջին հացի անուշաբույր հոտը։ Իջանք թոնրատուն, սովորողները բացեցին գնդերը, տատիկը լավաշ ու բոքոն թխեց։ Տղաները հացը տարան մառան։ Մառանում սովորողները կերան իրենց թխած հացը՝ պանրով, լոլիկ, վարունգով, կանաչիով։
Օրը շատ հագեցած էր, միջավայրը շատ խնամքով պատրաստված, դասավորված։ Թե՛ բակը, թե՛ տան բոլոր անկյունները շատ կոլորիտային էին․ ամենուր աշխատանքային գործիքներ, հայկական զարդանախշերով գորգեր, կարպետներ, կանանց տարազներ, հին, ազգային ոճով կահավորված պատշգամբ․․․ Իսկական կրթամշակութային կենտրոն։ Շնորհակալ եմ օրվա համար։
Սկսեմ նրանից, որ վերջերս եմ պարտադիր ատեստավորում անցել «Մխիթար սեբաստացի» կրթահամալիրում։ Ատեստավորումն իրականացվում էր մի քանի բնագավառով՝ ընդհանուր մանկավարժություն, մասնագիտական զարգացում, ՏՀՏ նոր գործիքների կիրառում։ Աշխատանքները շատ հետաքրքիր էին կազմված․ զարգացնող, մտորելու տեղիք տվող, աշխատանքդ վերանայելու, զարգացնելու, հմտություններդ ավելի շատացնելու հնարավորություն ընձեռող։Անմիջապես իմ ատեստավորումից հետո, սկսեվեցին կամավոր ատեստավորումները։ Ծանոթացա հարցաշարերից մեկ, երկուսին, չուզեցի նայել մյուսները։ Համոզված եմ, որ նույն սկզբունքով են կազմված։ Հարցաշարերն ինձ հիշեցրին բուհ ընդունվելու շտեմարանները՝ բացառապես անգիր անելու աշխատանքներ։ 21-րդ դարում մարդը կարիք չունի ինչ-որ բան անգիր անելու։ Այնքան հեշտ ու այնքան բաց է ամեն ինչ, ցանկացած տեղեկություն, որ միայն ցանկություն է պետք սովորելու։ Հեղինակայնին կրթություն իրականցնող մանկավարժը չպետք է ատեստավորվի նման հարցաշարերի միջոցով։ Թող տեսնեն մեր կրթահամալիրի վերջերս իրականացրածը, փորձեն նմանատիպ մոդուլներ կազմել, որի արդյունքում ուսուցիչներին ոչ թե կստիպեն ինչ-որ բաներ անգիր անել, որը շատ շուտ էլ կմոռանան, այլ կզարգացնեն հմտություն, իրական գիտելիք, միտք, կիրառելի հմտություն, քննադատական մտածողություն։